Home Editorial Anseng Baljokani Editorna Chitti Matjang Janggi Nana Rakom Home Delights Contact Us
Date: March 4-10, 2013, Vol. VI, Issue 32

A·dokni rengsi sakantinan

An·chingni a·song, bringimin jat, kusik bewalrang aro janggi tangani gadangrango
dingtanggrikani dongoba, nangrime rikgimin a·song ong·a. Indiani ari ning·o ga·akgipa salgro salaram, salpeng aro saliramni pilak songdonggipa ong·e, janggi tangani apsan bilko man·a; saksaba sakgipinna batja ba komina niamo pangchakani dongja. Pilak mandean apsan aro ra·rona grigipa rengsiko pa·paanian sakantini nisan ong·a.
Indiba, a·songo mande jellaniko nigope nie, jakchomsa gita manderangsan kosakona chu·batgipa gadangona sokna man·a; mitamranga sokna gitdiko, mitamrangara bijangchio aro mitamrang kamabatao dongna ga·aka. Ia gadangrangni dingtang ong·ania bang·a somairangon an·chingni songtangtango songsaro kam ka·anirangchi an·tangko jakkalao pangchaka.
Mitamrang man·e cha·gipani nokdango atchianichi aro mitamranga gamko man·rikanichi chu·gipa biapo altuen dongna man·a; man·e cha·ani aro gam gnangani altuen manderangko salna bil man·a; indake an·tangni ning·o bilakgipa dolrangko bikote, an·tangtangko chu·gipa gadango rakina man·a; indakgipa manderang kakket sasonko on·na man·rongja.

U·i masigipa, bil amgipa manderang, me·a ba me·chik ong·bo, chu·gipa biapona sokna maming champengani dongja. “Chu·batgipa gadango pangnan biap bang·a” ine agana. Chu·batgipa gadang inon a·songko sason ka·ani bidingo ong·aniko iano miksonga. Sko chake chu·gipa gadango dongna tikkelengon, an·ching a·songtangni niamko pe·aniko, gisik ka·tongko brangataniko aro kakketgija kamrangko ka·gnioniko an·tangtangko chelatna simsakchengna nanga. Bang·bata kakketgija kamranga, kragija kamrangchi man·gipa manderangni janapani a·sel ong·a, jemangan chu·gipa biapo dongpana ske je cholchiba bilko man·a kam ka·a. Bang·a jatrangni nangrime rikgimin sasonko mande saksani miksonganichi chu·sokatna man·ja. Dingtang dingtang ong·katgipa chanchiani aro nikanirangsa mandetangchi sasonko chalaiani gun ong·a.
Uni gimin saksa sakgipin baksa ku·cholsan ong·aniko amna nanga. Kucholsan ong·e sko chaprime kam ka·ode, saksa sakgipinni gualanirangko, ong·gija bewalrangko aro ma·sisokgijaniko mesokgrikna man·gen; indake dakachi a·songni gamna, tangkana ba man·gnina mikbokna nanganiona sokjawa aro pilak songdonggiparangonan jakgitele sason ka·ani chu·gipa rengsi sokatangna man·gen.


Published, edited and owned by Semeri Alva B Sangma
Phone: (03651) 221546, Fax: (03651) 221546
Web concieved by Prime Alternatives