Gout aro uko champengani
Dr.Dipsera A.B.Sangma

Gout, ian be·enni biritchurangni, mongsongbate ja·sku-jakskurangni ripome saani ong·a. Ripomgipa bakrango namen sa·dika baksana gitchak gitchak dakgen aro be·en bigilko ching·e nikgen. Gout ong·on mongsonggipa bakranga ja·si bimarango ripomani aro basakobasa ja·gitok aro ja·pa ki·tikrango ong·na man·a.
Maini a·sel gout ong·a?
Gout-an arthritis ba beholi sabisini ong·rongbatgipa ba nikrongbatgipa rokom ong·a. Ia sabisiko ong·atgipa mongsonggipa a·selara uric acid-ni tang·doani gimin ong·a aro ian metabolism-o tik ong·gijanichi ba kidney-ni agitchapile donggipa uric acid-rangko galatna man·jani gimin ong·na man·a. Iako bilongbegipa saani gita niknaba donga. An·chio uric acid tang·doaniko hyper Uri Caemia ine medical jakkalanirango agana. Ian gout sabisiko ong·atanio mongsonggipa kenchakani ong·a.
Gout-ko ong·atna dakchakgipa a·selranga genetic ba ma·kringoni ong·rikrikani; mildugaani ba be·en jrimdugaani, jekai be·eno uric acid-ko bariatgipa cha·aniko nangana batpile cha·ani; samtangtango lead ba sisani sil (settu), indakgiparangko chakrongani, agrepile chuko jakkalani; purine gnanggipa cha·anirang, jekai be·en gitchak, bikrok gnanggipa na·tok, indakgiparangko bang·e bang·e cha·ani; aro dongkamgipa sabisi, jekai diabetes, hypertension, sickle cell anaemia, kidney namgija saani, iarangan ong·a.
Gout sabisini gadangrang:
Gout sabisi gadangbri dake bilongrorona man·a: First stage ba skanggipa gadango, sagipa mandeni uric acid tang·dogen indiba uo maming gipin neng·nikanirang dongjawa.
Second stage ba gnigipa gadango, biritchuni bako aro wilwilao uric acid crystalrang tom·dakgen. Indake ong·on sagipa mongsongbate walni somoirango bilongbee saknaaniko man·gen aro bang·bata changon saani ja·si bimao aro basakoba ja·pa ki·tik ba ja·gitokrango ong·gen. Sagipa biritchurangni bako ding·bom ding·bom dake gitchakgen aro dangtapoba nom·e nikgen. Indiba ripomani aro sa·dikani sal 5-10-ni gisepon gimaangpilaigen.
Gittamgipa ba third stage-ko inter-critical gout ine agana. Skanggipa saaniko man·ani ja·mano adita jarangna ba bilsirangnaba sataijanaba donga. Bon·kamgipa ba fourth stage-de chronic gout ong·gen. Ia gadangona sokon gout ba biritchurango ripomani dikdikprakni gisepo ba adita jarangni gisepo ong·na man·a. Ripomani aro sa·dikani bakroe dongkamnaba donga aro basakobade sagipa biritchurangko nosto ong·atkamnaba donga. Gout-ko me·asarangsa man·batronga aro giseposan me·chikrangode ong·aia aro uaba menopause-ni ja·manosa ong·bataia.
Champengani: Gout-ko champengna mongsonggipa dakna nanganide medical check-up ka·rongani aro janggi tangani bewalko dingtangatanian ong·aia. Alkaline gnanggipa ringani bitchirang jekai, buttermilk, narikel bitchi, akkaru bitchi, iarangba dakchakani ong·a, maina uarang kidney gita uric acid-rangko nisiatna dakchaka. Iarang baksa mongsongbate salanti glass 8 – 10 chiko ringronganian be·eno donggipa namgija bisirangko susrange galna dakchakgen.
Passive Smoking:Passive smoking, ine aganon, sakgipinni ta·makku ba cigarette ringe wal·ku watgipako ringopman·aniko miksonga. Health expert-rangni aganani gitade, minit 30 mangmangna cigarette ringgipani wal·kuko chakoba, ta·makku ringgijagipa an·sengbaljokgipa mandeni an·chi ja·dilrangko nosto ka·na man·aia. Ta·makkuni wal·kuko ringopman·ani ja·mano konta 24-nade mandeni be·enni an·tangko namatpiltaina man·ani mechanism-ko ka·sinata. Iani bidingo poraisandianiko dake man·aniko American College of Cardiology-ni journal-ko see chapa ka·ataha.